काठमाडौं । मनसुनी वायुको प्रभावका कारण आज राति देशभरको मौसम सामान्यतया बदली भई देशका विभिन्न भू-भागमा मेघगर्जन र चट्याङसहित वर्षा हुने मौसम पूर्वानुमान महाशाखाले जनाएको छ। विशेष गरी कोशी, बागमती र गण्डकी प्रदेशका हिमाली भू-भागका धेरै स्थानमा मध्यम वर्षा तथा हिमपातको सम्भावना छ भने लुम्बिनी, कर्णाली र सुदूरपश्चिमका हिमाली क्षेत्रका केही स्थानमा पनि हिमपात र वर्षा हुन सक्नेछ।

पहाडी क्षेत्रतर्फ कोशी, बागमती, गण्डकी र लुम्बिनी प्रदेशका धेरै ठाउँमा तथा कर्णाली र सुदूरपश्चिमका केही स्थानमा मेघगर्जनसहित मध्यम वर्षाको अनुमान गरिएको छ। यस्तै, तराईका भू-भागमा बागमती, गण्डकी, लुम्बिनी र सुदूरपश्चिमका केही स्थानका साथै कोशी र मधेस प्रदेशका थोरै स्थानमा वर्षा हुने महाशाखाको बुलेटिनमा उल्लेख छ।

महाशाखाका अनुसार आज राति कोशी, बागमती र गण्डकी प्रदेशका हिमाली तथा पहाडी भू-भागका साथै लुम्बिनी प्रदेशको पहाडी र तराईका एक-दुई स्थानमा भारी वर्षाको सम्भावना रहेको छ। भारी वर्षाका कारण बाढी, पहिरो तथा डुबानको जोखिम बढ्न सक्ने भएकाले सर्वसाधारणलाई रातिको समयमा आवश्यक पूर्वसतर्कता अपनाउन आग्रह गरिएको छ।