नेकपा एमालेकी नेत्री तथा सांसद रामकुमारी झाँक्रीले प्रतिनिधिसभा पुनःस्थापना गरेर सर्वाेच्च अदालतले न्यायपालिकाको गरिमा बढाएको प्रतिक्रिया दिएकी छन् ।

सर्वाेच्च अदालतले संसद पुनःस्थापना गर्दै रिट निवेदक नेपाली कांग्रेसका सभापति शेरबहादुर देउवालाई प्रधानमन्त्री नियुक्त गर्न परमादेश दिएपछि नेत्री झाँक्रीले बधाई दिएकी छन् ।

‘जब राजनीतिक नेतृत्वले विवेक गुमाउँछ, अहंकार र दम्भबाट ग्रसित हुन्छ । जनताको सार्वभौम सत्ता, कानून र विधि आफूमा निहित रहेको राज्य ठान्छ नि ! राजनीतिका सबै मामिलाः लोकतन्त्र, संविधान र संसदसहित दलको आन्तरिक व्यवस्था विधान, विधि र निर्णयहरूमा अदालत प्रवेश मात्र गर्दैन, परीक्षण गर्न जानुपर्ने अवस्था आउने रहेछ । त्यसैले राजनीति नेतृत्व कस्तो हुने भन्ने निर्णय गर्नु धेरै ठूलो कुरा रहेछ । न्यायपालिकाले आफ्नो गरिमा बढाएको छ । संवैधानिक इजलासका माननीय न्यायमूर्तिहरू, स्वस्थ बहस र पैरवी गर्ने विद्वान वरिष्ठ अधिवक्ता र अधिवक्ता मित्रहरू यो प्रक्रियाको राजनीतिक नेतृत्व, मिडिया र नागरिक समाज सबैप्रति हार्दिक धन्यवाद ज्ञापन गर्दछु । लोकतन्त्रको पक्षधर नेपाली जनता र माननीय सांसदज्यूहरूलाई हार्दिक बधाई !’