काठमाडौं। लियोनल मेस्सीलाई समावेश गर्दै पेरिस सेन्ट जर्मेन (पीएसजी) ले रेइम्सविरुद्ध खेल्ने टिम घोषणा गरेको छ।

पीएसजीले घोषणा गरेको २२ सदस्यीय टिममा मेस्सी अटाएका हुन्।

पीएसजीले आज राति रेइम्सविरुद्ध खेल्नेछ। रेइम्सविरुद्धको खेलबाट मेस्सीले डेब्यु गर्ने सम्भावना रहेको छ।

अर्जेन्टिनाका कप्तान मेस्सीले अघिल्ला तीन खेलमा मौका पाएका थिएनन् । मेस्सीसँगै केलियन एमबाप्पे, नेयमार पनि टिममा रहेका छन्।

रेइम्सको घरेलु मैदानमा हुने खेल नेपाली समय अनुसार राति साढे १२ बजे सुरु हुनेछ ।

बाल्यकालको क्लब बार्सिलोना छाड्दै मेस्सी यसै सिजन पीएसजीमा आबद्ध भएका छन् । बार्सिलोनाले आर्थिक कारण देखाउदै मेस्सीलाई राख्न नसक्ने बताएपछि अर्जेन्टिनी फरवार्ड फ्रान्स आएका हुन् ।

फ्रान्स आएपनि उनीलाई टिममा राखिएको थिएन । मेस्सीसंगै नेयमार समेत टिममा थिएनन् । दुवै खेलाडी प्रशिक्षणमा भने सहभागी थिए । दुवै खेलाडीलाई उचित समयमा मैदान उतार्ने क्लबको योजना थियो ।

पीएसजीले मेस्सी र नेयमार बिनै सिजनको सुरुवाती तीन खेल खेलिसकेको छ । एम्बाप्पे प्रेरित पीएसजीले तीनै खेलमा जित समेत निकालेको छ ।

एम्बाप्पेले सुरुवातमा सम्हालेको मोर्चामा आईतबारबाट मेस्सी र नेयमार समेत जोडिएका छन् । राति रेइम्सविरुद्ध हुने खेलमा मुख्य प्रशिक्षक मौरिसियो पोचिटिनाले एम्बाप्पे, नेयमार र मेस्सीलाई संगै उतार्ने तयारी गरेका छन् ।

समकालिन विश्व फुटबलका दुई उत्कृष्ट खेलाडी नेयमार र एम्बाप्पेको साथमा सर्वोत्कृष्ट मेस्सीको संयुक्त प्रर्दशनलाई विश्व फुटबलले प्रतिक्षा गरेको छ ।