उपाधिसँगै संकटाले नगद १० लाख १ हजार रुपैँया हात पारेको छ । उपविजेता बनेको अफ्रिकनले नगद ५ लाख १ हजारमा चित्त बुझायो ।

खेलको निर्धारित समय र थप गरिएको ९० मिनेटको समय १-१ गोलको बराबरीमा सकिएपछि खेल पेनाल्टी सुटआउटमा गएको थियो ।

पेनाल्टीमा संकटाका अमित तामाङ, सुवास गुरुङ,निरज बस्नेत, आयुष घलानले गोल गरे ।

सरोज दाहालको प्रहार अफ्रिकनका गोलकिपरले बचाए ।

अफ्रिकनका यानिक र रिमले गोल गरे । तर, कुइटेको प्रहार बाहिरिएको थियो भने एमबाकोपको प्रहार संकटाका गोलकिपर राजाबाबु थापाले बचाए ।

पेनाल्टी अघि खेलको १० औं मिनेटमा बासेकले गोल गर्दै अफ्रिकन रुटलाई १-० को अग्रता दिलाएका थिए । उनले मौसाको सटिक पासमा गोल गरे ।

खेलको २१ औं मिनेटमा अफ्रिकनले अग्रता दोब्बर बनाउने मौका गुमायो । संकटाका डिफेन्डरबीच तालमेल नमिल्दा डिबक्स भित्र प्राप्त बलमा अनमार्क रहेका बासेकले गोल गर्न सकेनन् । उनको कडा प्संरहार संकटाका गोलकिपर राजाबाबु थापाले उत्कृष्ट बचाउ गरे ।

खेलको ३७ औं मिनेटमा संकटाका फोफानाको हेडर बल अफ्रिकनका गोलकिपर डीए स्याल्भियोले सहजै बचाए ।

खेलको ४९ औं मिनेटमा ठिक डिबक्स भित्रबाट मौसाको प्रहार संकटाका गोलकिपर राजाबाबुले उत्कृष्ट बचाउ गरे ।

तर, खेलको ५१ औं मिनेटमा ग्लोरीले गोल गर्दै संकटालाई १-१ गोलको बराबरीमा ल्याए । गोलकिपर राजाबाबुको लामो पासमा उनले गोल गरेका हुन् ।

६८ औं मिनेटमा संकटाका फोफानाको डिबक्सको ठिक भित्रबाटको प्रहार अफ्रिकनका गोलकिपर स्याल्भियोले बचाए ।

त्यसपछि खेलमा थप गोल भएन र खेल अतिरिक्त समयमा गयो ।

अतिरिक्त समयमा संकटाले केहि गोलको अवसर खेल फालेको थियो ।

१ सय १० औं मिनेटमा ग्लोरीको फ्री हेडर बल पोस्ट नजिकबाट बाहिरियो ।

खेलको १ सय १२ औं मिनेटमा संकटाका ग्लोरीले गोलकिपर अघि बढेको अवस्थामा गोल गर्न सकेनन् । उनको चिप बलले पोस्टको दिशा लिन सकेन ।

संकटा क्लबका गोलकिपर राजाबाबु थापा सर्वोत्कृष्ट खेलाडी घोषित भएका छन् ।सर्वोत्कृष्ट बनेका राजाबाबुले एप्रिला स्कुटर प्राप्त गरे ।

सुर्य बहादुर केसी मेमोरियल उत्कृष्ट गोलकिपर राजाबाबु थापा, उत्कृष्ट डिफेन्डर निरज बस्नेत, उत्कृष्ट मिडफिल्डर रिम, उत्कृष्ट स्ट्राइकर बासेक र उत्कृष्ट प्रशिक्षक अफ्रिकनका सर्ज बोरिस चुनिए । उनीहरुले जनही २५/२५ हजार प्राप्त गरे ।

सर्वाधिक गोलकर्ता पुलिसका बुद्द बल तामाङ, संकटाका ग्लोरी, अफ्रिकनका बासेक र मौसाले संयुक्त प्राप्त गरे ।

फेयर प्ले अवार्ड नेपाल पुलिस क्लबले प्राप्त गरेको छ ।