केपी शर्मा ओलीको विकल्पमा नयाँ सरकार दिन नसकेपछि माओवादी अध्यक्ष प्रचण्ड समीक्षा बैठक बस्न भन्दै शुक्रबार बूढानीलकण्ठस्थित काँग्रेस सभापति शेरबहादुर देउवाको निवासमा पुगे । तर, माओवादीका नेताहरु चाहिँ यस्तो समीक्षा बैठक काँग्रेस नेताको घरमा हैन, आफ्नै पार्टीभित्र गर्नुपर्ने बताउँछन् ।

अब प्रधानमन्त्री ओलीले देशलाई चुनावतर्फ धकेल्न खोजिरहेका छन् । यो अवस्थामा काँग्रेस, जसपा वा माधव नेपाल समूहको मात्र पछि लागिरहने कि पार्टीले आफ्नो आन्तरिक तयारी पनि गर्ने रु यसबारे गम्भीर भएर समीक्षा गर्नुपर्ने बेला आएको माओवादी नेताहरुको बुझाइ छ ।

यसै सन्दर्भमा अहिले माओवादी पार्टीभित्र प्रचण्डले माधव नेपालसँग गरेको सहकार्य र संगतबाट के फाइदा भयो भन्ने अनौपचारिक बहस सुरु भएको छ । माधव नेपालसँग मात्र होइन कहिले काँग्रेससँग त कहिले एमालेसँग हुँदै आएको गठबन्धनमाथि नै समीक्षा हुनुपर्ने माग माओवादीभित्र उठ्न थालेको एक नेताले नाम उल्लेख नगर्ने शर्तमा बताए ।

यतिखेर प्रचण्ड रनभुल्लमा पर्दै नयाँ बाटो खोजिरहेका छन् । बाबुराम भट्टराई र उपेन्द्र यादवसहित शेरबहादुर देउवासँगको सहकार्यमा प्रतिपक्षी मोर्चामा उनले आफूलाई उभ्याएका छन् ।

अब प्रचण्डले उक्त मोर्चाको स्थायित्व र विश्वसनीयताबारे पनि आजै समीक्षा गर्न जरुरी देखिएको सो पार्टीका नेताहरु बताउँछन् । माओवादीका कतिपय कार्यकर्ताहरु अब प्रचण्डले अरुको भरमा परेर होइन, आफ्नै खुट्टामा उभिएर पार्टी निर्माण र राजनैतिक परिचालन गर्नुपर्नेमा जोड दिन्छन् ।