रुपन्देही,१७ असोज । नेपालीहरुको महान चाड बडा दशै, शुभ दिपावली र छठ पर्व-२०७८ लाई मध्य नजर गर्दै जिल्लाको शान्ति सुरक्षा लगायत ट्राफिक व्यवस्थापनको लागि जिल्ला प्रहरी कार्यालय रुपन्देहीबाट तयार पारेको सुरक्षा योजना बमोजिम चाड पर्वको अवधिमा जिल्ला भित्र आउने र बाहिरिने यात्रुहरुको सुविधा र सहजीकरणलाई मध्यनजर गर्दै जिल्ला प्रहरी कार्यालयका  प्रमुख प्रहरी उपरीक्षक मनोज कुमार के.सी.को उपस्थितिमा रुपन्देहीको सिद्धार्थनगर नगरपालिका वडा नं. १ बेलहिया चेक पोष्ट, बुटवल उप-महानगरपालिका स्थित नयाँ बस्पार्क र भैरहवा बसपार्कमा यात्रु सहायता कक्षहरुको स्थापना गरिएको छ ।

यात्रु सहायता कक्षबाट प्रदान हुने सुविधाहरु :

१. महान चाड बिजया दशमी र दिपावलीको अवसरमा बिशेष गरी रुपन्देही जिल्लाको बिभिन्न स्थान हुँदै भित्रिने र बाहिरिने विभिन्न सवारी साधनहरुमा सवार गर्ने यात्रुहरुलाई तोकिएको दर रेट भन्दा बढी भाडा असुल उपर भएमा खबर गर्न ।

२. हाल महामारीको रुपमा फैलिएको कोभिड-१९ को संक्रमण फैलन नदिन सवारी साधनमा यात्रा गर्ने यात्रुहरुले अनिवार्य मास्कको प्रयोग लगायतका स्वास्थ्य सावधानी पालन गरे नगरेको निग्रानी गर्न ।

३. सार्वजनिक सवारी साधनहरुमा यात्रा गर्दा आफ्नो सामानहरु हराएमा वा छुटी जाने भएमा तत्काल खबर गर्न ।

४. सार्वजनिक सवारी साधनहरुमा टिकट बुकिङ्ग भएको अवस्थामा यात्रु अलपत्रमा परी आफुले टिकट बुकिङ्ग गरेको सवारी साधन छुटी गएमा खबर गर्न ।

५. सार्वजनिक सवारी साधनमा यात्रा गर्दा यात्रुहरुको बहुमुल्य सामानहरु चोरी, लुटपाट भएमा वा हराएमा खबर गर्न ।

६. सार्वजनिक सवारी साधनमा यात्रा गर्दा कुनैपनि व्यक्तिबाट दुर्यवहार भएमा रिपोर्ट गर्न ।

७. सार्वजनिक सवारी साधनहरुमा यात्रा गर्ने महिलाहरु माथि कुनैपनि किसिमले यौनजन्य दुर्व्यबहार भएमा सो को रिपोर्ट गर्न ।

८. तोकेको गन्तव्यमा सार्वजनिक सवारी साधनले यात्रुहरु नपुराएमा, चालकले मादक पदार्थ सेवन गरी सवारी चलाएमा, क्षमता भन्दा बढी असुरक्षित तरिकाले तथा छतमा यात्रुहरु राखी जोखिम पुर्ण यात्रा गराएमा कारवाही गर्न ।

९. सवारी साधनहरुमा यात्रा गर्ने क्रममा यात्रुहरुको स्वास्थ्य सम्बन्धी समस्या आएमा तत्काल रिपोर्ट गर्न ।

१०. वृद्ध-वृद्धा, अन्ध-अपाङ्ग लगायतका फरक क्षमता भएका यात्रुहरुलाई बिशेष ख्याल गरी सहज यात्राको वातावरण बनाउन समेत यात्रु सहायता कक्ष सञ्चालनमा ल्याईएको प्रहरीले जानकारी दिएको छ ।

यदि यात्रुहरुलाई कुनैपनि प्रकारको सेवा, सुविधाहरुको बारेमा गुनासो, सुझाव र आवश्यकता परेमा जिल्ला प्रहरी कार्यालय रुपन्देहीको निशुल्क नम्बर १०० र प्रहरी कन्ट्रोल रुम ९८५७०९०४८२ र ९८५७०९०६२२ मा सम्पर्क गर्नुहुन सम्पुर्ण सर्वसाधारणहरु तथा रुपन्देहीबासीहरुमा जिल्ला प्रहरी कार्यालय रुपन्देहीले अनुरोध गरेको छ ।