नेपालका ४३ जिल्लामा पाँच सयभन्दा बढी र १५ जिल्लामा दुई सय बढी कोरोना भाइरस संक्रमित उपचाररत छन् । देशभर सक्रिय संक्रमितको संख्या ६३ हजार २५७ जना पुगेको छ । त्यस्तै देशभर संक्रमणबाट ८ हजार ५०६ जनाले ज्यान गुमाइसकेका छन् ।

स्वास्थ्य तथा जनसंख्या मन्त्रालयका अनुसार प्रदेश १ को मोरङ, सुनसरी, झापा, प्रदेश २ को बारा, पर्सा, रौतहट, धनुषा, सप्तरी, सिराहा, सलार्ही र महोत्तरी, बागमती प्रदेशको काठमाडौं, भक्तपुर, ललितपुर, काभ्रेपलाञ्चोक, रामेछाप, सिन्धुली, सिन्धुपाल्चोक, धादिङ, दोलखा, नुवाकोट, चितवन र मकवानपुरमा पाँच सय बढी सक्रिय संक्रमित रहेका छन् ।

त्यसैगरी, गण्डकी प्रदेशको कास्की, तनहुँ, नवलपरासी पूर्व र गोरखा, लुम्बिनी प्रदेशको दाङ, बाँके, बर्दिया, पाल्पा, रुपन्देही, नवलपरासी पश्चिम, रोल्पा र कपिलवस्तुमा पाँच सय बढी सक्रिय संक्रमित रहेको स्वास्थ्य मन्त्रालयले जनाएको छ ।

कर्णाली प्रदेशको सुर्खेत, दैलेख र सुदुरपश्चिम प्रदेशको कैलाली, कन्चनपुर, अछाम, डडेलधुरा, डोटी र बैतडीमा पनि पाँच सय बढी सक्रिय संक्रमित पुगेका छन् । त्यसैगरी, देशभर ५१५ जना व्यक्ति क्वारेन्टाइनमा रहेको स्वास्थ्य मन्त्रालयले जनाएको छ ।

त्यसैगरी, प्रदेश १ को पाँचथर, संखुवासभा, ओखलढुंगा, खोटाङ र उदयपुर, प्रदेश २ को कुनै पनि जिल्लामा दुई सय भन्दा बढी संक्रमित रहेका छैनन् । बागमती प्रदेशको रसुवा, गण्डकी प्रदेशको लमजुङ, स्याङ्जा, पर्वत, म्याग्दीमा र लुम्बिनी प्रदेशको गुल्मी र अर्घाखाँची जिल्लामा दुई सय भन्दा बढी संक्रमित रहेका छन् ।

कर्णाली प्रदेशको सल्यान र रुकुम पश्चिममा दुई भन्दा बढी संक्रमित रहेका छन् । त्यस्तै सुदुरपश्चिम प्रदेशको दार्चुला जिल्लामा दुई सयभन्दा बढी संक्रमित रहेको स्वास्थ्य मन्त्रालयले जनाएको छ ।