काठमाडौं,४ मंसिर। पछिल्लो २४ घण्टामा २४२ जना कोरोना संक्रमित थपिएका छन् । देशभर गरिएको ४ हजार १४५ पीसीआर र २ हजार ९९१ जनाको एन्टीजेन परीक्षणका क्रममा २४२ जनामा संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ ।

यो सँगै कुल संक्रमितको संख्या ८ लाख १८ हजार ७८७ जना पुगेको छ । कुल संक्रमितमध्ये ७ हजार ३०३ जना सक्रिय संक्रमित छन् । गत २४ घण्टामा ४४४ जना संक्रमित निको भएका छन् । यो सँगै देशभर निको हुनेको संख्या ७ लाख ९९ हजार ९८९ पुगेको छ ।

उक्त अवधिमा १ जना संक्रमितको मृत्यु भएको मन्त्रालयले जनाएको छ । हालसम्म कोरोना संक्रमणबाट मृत्यु हुनेको संख्या ११ हजार ४९५ पुगेको छ । हाल ९८ जना क्वारेन्टाइनमा छन् । २३४ जना आइसीयू र ५५ जना भेन्टिलेटरमा रहेको मन्त्रालयले जनाएको छ ।

देशभर दुई वटा जिल्लामा मात्र कोरोनाको पाँच सय बढी सक्रिय संक्रमित रहेका छन् । हाल काठमाडौं र ललितपुर जिल्लामा मात्र कोरोनाका पाँच सय बढी सक्रिय संक्रमित रहेको स्वास्थ्य तथा जनसंख्या मन्त्रालयले जनाएको छ । काठमाडौंमा ५१२ र ललितपुरमा ५५७ जना सक्रिय संक्रमित छन् ।

यस्तै आठ वटा जिल्लामा भने २ सयभन्दा बढी सक्रिय संक्रमित छन् । मोरङ, सुनसरी, झापा, भक्तपुर, कास्की, नवलपरासी पूर्व, बाँके र कैलालीमा कोरोनाको दुई सय बढी सक्रिय संक्रमित छन् । ओखलढुंगा, मनाङ, मुस्ताङ, हुम्ला, डोल्पा र जाजरकोटमा सक्रिय संक्रमितको संख्या शून्य रहेको मन्त्रालयले जनाएको छ ।