नेकपा (एमाले) का वरिष्ठ नेता माधव नेपाल पक्षीय नेतृ रामकुमारी झाँक्रीले राजनीतिक विषयमा उधारो सम्झौता हुन नसक्ने बताएकी छन् । एमालेका नेताहरूबीच विवाद समाधानका लागि वार्ता चलिरहेका बेला नेतृ झाँक्रीले राजनीति व्यक्तिगत लेनदेनको मामिला नभएकाले उधारो सम्झौता नहुने बताएकी हुन् ।

शुक्रबार ट्विटमार्फत नेतृ झाँक्रीले जनता, राष्ट्र, संविधान र व्यवस्थाको रक्षाका लागि जुनसुकै जोखिम उठाउन तयार हुनुपर्ने पनि उल्लेख गरेकी छन् । बिहीबार साँझ राष्ट्रपति विद्यादेवी भण्डारी र नेता नेपालबीच भेटवार्ता भएको थियो । बिहीबार दिउँसो नै विष्णु पौडेल, सुरेन्द्र पाण्डे, गोकर्ण विष्टसहितका नेताहरूबीच पनि भेटवार्ता भएको थियो ।

“राजनीति व्यक्तिगत लेनदेनको मामिला होइन । राजनीतिक विषयमा उधारो सम्झौता पनि हुनसक्दैन । युद्धमा होमिएका क्रान्तिकारीहरूका निम्ति विजय र मृत्युको बराबर सम्भावना हुन्छ । जनता, राष्ट्र, संविधान र व्यवस्थाको रक्षाका लागि जुनसुकै जोखिम उठाउन तयार हुनुपर्छ,” उनले ट्विटरमा लेखेकी छन् ।