पाल्पा ।  संस्कारसहित ज्ञानविज्ञानको व्यवहारिक रूपमा अध्ययन हुने ठाउँको खोजी भइरहेको बेलामा शिक्षाक्षेत्रमा नै नयाँ र समयसापेक्ष “अमृत आहार ऋत व्यवहार, संस्कारसँगसँगै आविष्कार”को नारा लिएर रम्भा १ पाल्पा र गल्याङ १ मालुङ्गाको सीमा पवित्र आध्यात्मिक केन्द्र उत्तरवाहिनी क्षेत्रमा श्रीकालीगण्डकी ज्ञानविज्ञान प्रतिष्ठानद्वारा सञ्चालित श्रीकालीगण्डकी गुरुकुलम् सञ्चालनमा आएको छ।

संस्कृत गुरुकुलमा विज्ञान विषयको पढाइ नहुने र आधुनिक विद्यालयमा वेदादि संस्कृत सम्बद्ध विषयहरू नपढाइने कारणले उत्पन्न अभावको परिपूर्तिका लागि हरेक विद्यार्थीलाई वेद र विज्ञान, संस्कार र आविष्कार, ज्ञान र विज्ञान एकैठाउँमा पढाएर ज्ञानद्वार ऋषि र विज्ञानद्वारा वैज्ञानिक चेतना सम्पन्न बनाई वैज्ञानिक ऋषिद्वारा विश्वशान्ति स्थापनाको लक्ष्य लिएर यो गुरुकुल सुरु गरिएको छ। नैतिकता हराइरहेको, संस्कारको लोप भइरहेको र संस्कृतिको नाममा विकृतिहरू बढिरहेको बेलामा यसप्रकारको शिक्षा अपरिहार्य देखिन्छ । यो आधुनिक गुरुकुलमा अङ्ग्रेजी, संस्कृत र नेपाली गरि तीनवटा भाषामा पढाइ भइरहेकोले विद्यार्थीलाई राष्ट्रिय अन्तर्राष्ट्रिय भाषामा आफ्ना कुरा राख्न र वैश्विक जनशक्ति बन्नमा सहज हुनेछ।

विशाल खेलमैदान, पौडिने पोखरी, आइसीटी ल्याव, आविष्कार केन्द्र, बालमैत्री एवम् प्रविधिमैत्री वातावरण भएकोले अभिभावकको रोजाइको र अनेकौं अभियन्ताहरूक‍ो सपनाको यो आधुनिक गुरुकुलमा ५ कक्षा उत्तीर्ण भएमा विद्यार्थीहरूलाई प्रवेश परीक्षा लिई भर्ना गरिने व्यवस्था छ। प्रवेश परीक्षा जेष्ठ ९ गते दिनक‍ो ११ बजे राखिएको छ। फुलबारी, करेसाबारी, गौशाला, भान्सा, अतिथिसत्कार, विविध अतिरिक्त क्रियाकलापमा समेत संलग्न भएर व्यवहारिकरूपमा धेरै सीपको विकास गर्न समेत यो गुरुकुलमा अनुकूल वातावरण छ।