यूएईमा जारी १३ औँ सिजनको आईपीएल अन्तर्गत चेन्नई सुपर किंग्स (सीएसके)विरुद्ध दिल्ली क्यापिटल्सका ओपनिङ ब्याट्सम्यान शिखर धवनले शतक बनाएका छन् ।

उनले ५७ बलमा १४ चौका र १ छक्कासहित शतक बनाएका हुन् । आईपीएलमा शिखरको यो पहिलो शतक हो । यसअघि आईपीएलमा उनको उच्च स्कोर ९७ रन थियो । शिखरले आज तीन पटक जीवनदान पाउँदा शतक बनाउन सफल भए ।

शिखरले पछिल्लो समय लगातार उत्कृष्ट प्रदर्शन गरिरहेका छन् । पछिल्ला तीन खेलमा उनले लगातार ५० भन्दा बढी रन बनाएका छन् ।

रबाडाले रचे इतिहास

दिल्ली क्यापिटल्सबाट आईपीएल खेलिरहेका तीव्र गतिका बलर कागिसो रबाडाले नयाँ उपलब्धि हासिल गरेका छन् ।

उनले विदेशी खेलाडीको रूपमा दिल्लीका लागि ५० विकेट लिने खेलाडीको उपलब्धि हासिल गरेका हुन् ।

रबाडा अब विदेशी खेलाडीको रूपमा दिल्लीका लागि सर्वाधिक विकेट लिने पहिलो बलर बनेका छन् । उनले हालसम्म दिल्लीका लागि ५० विकेट लिएका छन् । आज सीएसकेविरुद्ध एक विकेट लिएसँगै रबाडाले यो उपलब्धि हासिल गरे ।

साथै, उनले आईपीएलमा सर्वाधिक कम बल र कम म्याचमा ५० विकेट लिने खेलाडीकाे पनि कीर्तिमान बनाएका छन् ।

रबाडाले आईपीएलमा सर्वाधिक कम म्याचमा ५० विकेट लिने केकेआरका सुनील नारायणको कीर्तिमान भंग गरेका छन् । नारायणले ३२ म्याचमा  ५० विकेट लिएका थिए । अब रबाडाले उनलाई पछि पारेका छन् ।

रबाडाले २७ म्याचमै आईपीएलमा ५० विकेट लिन सफल भएका छन् । यो सूचीमा लसिथ मलिंगा तेस्रो स्थानमा छन् । उनले आईपीएलमा ३३ म्याचमा ५० विकेट लिएका थिए ।

त्यस्तै, रबाडाले सर्वाधिक कम बलमा ५० विकेट लिने मामलामा मलिंगाको कीर्तिमान तोडेका छन् ।

मलिंगाले ७ सय ४९ बलमा ५० विकेट लिएका थिए । रबाडाले भने ६ सय १६ बलमै ५० विकेट लिन सफल भए ।