आईसीसी विश्वकप क्रिकेट लिग–२ को त्रिकोणात्मक एकदिवसीय अन्तराष्ट्रिय सिरिज अन्तर्गत  अमेरिकाविरुद्धको खेलमा नेपालका कुशल भुर्तेल प्लेयर अफ दि म्याच घोषित भएका छन् ।

नेपाललाई जित दिलाउन उत्कृष्ट प्रदर्शन गरेका कुशल प्लेयर अफ दि म्याच चुनिएका हुन् ।

ओमानको अल अमिरात क्रिकेट मैदानमा आइतबार नेपालले अमेरिकालाई ५ विकेटले पराजित गरेको थियो ।

नेपाललाई जित दिलाउन ओपनर कुशलले ८४ रनको अर्धशतकीय इनिङ्स खेले । उनले ९३ बलमा ३ चौका र ३ छक्का प्रहार गरे । कुशलको यो एकदिवसीय अन्तराष्ट्रियमा पहिलो अर्धशतक हो ।

कुशलले पहिलो विकेटका लागि आसिफ शेखसँग ६६ रनको साझेदारी गरेका थिए । पहिलो विकेटको रुपमा आसिफ २३ रनमा आउट भए ।

यस साझेदारी एकदिवसीय अन्तराष्ट्रियमा नेपालको कीर्तिमानी साझेदारी हो । यस अघि नेपालको उच्च साझेदारी ६१ रन रहेको थियो ।

सिरिज अन्तर्गत नेपालले अब दोस्रो खेलमा घरेलु टिम ओमानसँग खेल्नेछ । नेपाल र ओमानबीचको खेल भोलि मंगलबार हुनेछ ।