दशैं के हो त…??

मनमनै प्रश्न गर्छ

आफुलाई अतितको गर्भभित्र

झिल्के दाइको कलमा पाउँछ

पाँच दिन भयो दशैको लुगा लिन धाएको

अझै टाँक लगाउन बाँकी नै छ

केही छिनको पर्खाइपछि ऊ

लुरुक्क घर फर्कन्छ

आज त खसी काट्ने दिन

बाले जख्खु खसी ल्याएका छन् बजारबाट

धुवाँको मुस्लो निकाल्दै सोतेबाट फु- फु गरिरहेछन्

साने उठ् आज त टीका लगाउने दिन

खल्ती भरि पैसा भर्ने

खुसीले जुरुक्क उठेर पर धारामा थापिएर

काम्दै घर फर्कन्छ तर……

तर झल्याँस्स बिउँझिएको ऊ

आफूलाई थोत्रो चौतारोमा

जिर्ण वस्त्र बिचमा काँपिरहेको पाउँछ

अनायास उसको आँखा रसाउँछन्

ओहो…..!

आज दशैं… तर बेसहारा ऊ

मैलोले लट्टिएको कपाल,

झुत्रा – झुत्रा परेका वस्त्र,

परैबाट ढुङ्ग गह्नाउने

उसको शरीर,

मान्छेको होइन आज

पशुको कोटीमा झरेको छ ऊ

आफू ठाँटीदा गौरव मान्ने

आजको मानवलाई के थाहा …..?

उसमा पनि सम्वेदना छ भनेर

अरुलाई तल पार्न पाउँदा

आफ्नो इज्जत बढेको,

पशु प्रवृत्तिलाई के के चासो…..??

उसको पनि त्यस्तै रहर हुन्छ भनेर

बाटोभरि झिलिमिली परिवेश हेर्दै

आहा दशै….! भन्दै

तप्प – तप्प आँसु झार्दै ,

अमिलो मन लिएर

त्यही चौतारोमा थोत्रो कम्मलमा ,

अमिलो मन लिएर गुजुल्टिन्छ !!

– निरू गौतम

-मोरङ